有個同事佢從來都唔去旅行，突然發現佢狂請假，一問發現佢係咁去旅行，我好奇怪佢點解之前唔去，依家一下子先去咁多？
佢話，佢隻貓走咗，依家無養寵物，唔需要再留係度照顧佢哋。
動物好多人都喜歡，但喜歡還喜歡，養還養，婚後我都開始同老婆養寵物，係貴婦狗，叫妹豬。
每朝我一起身，佢就一定會起身，爬到我身邊伸個懶腰叫兩聲，然後我就要叫佢去廁所，然後再幫佢清潔同餵佢食野，跟住先到自己去廁所同擦牙洗臉食早餐。
每晚返嚟一開門都會見到佢係門旁邊，一放低個袋又要服侍佢去廁所同食野。
我覺得為人父母之前，最好先養吓寵物，因為你可以習慣一下自己每日都要為一種生活去付出，如果你連照顧佢、買野比佢、陪佢、擔心佢、甚至好似我同事咁為寵物而犧牲好多年無去過旅行，咁你會有個熱身，因為生小朋友比養寵物更需要付出。
我問點解佢唔帶佢去寵物酒店或者比親戚養，佢話，你嘅一生會有好多野，但寵物嘅一生就只有你，有時係唔捨得離開佢。
但養寵物，你需要有心理準備，要迎接佢走的一日。
寵物生命比人類短太多，好彩嘅有十幾廿年，唔好彩嘅十年八年，養寵物就要經歷一次生老病死，好多人試過一次之後就唔再養，因為佢唔想再承受一次傷痛。
望到寵物離開，會再次提醒你，每種生命都有完結嘅時間，你今日幾歲，仲有大約幾耐係呢度？會令你重新思考自己嘅人生。
無養寵物嘅人會睇得到養寵物嘅開心，但無付出嘅開心，其實好片面，做主人睇到嘅唔止開心，仲係一種陪伴，一種不離不棄，一種一世的關係。
人嘅一生，先係被人照顧而活，然後我哋學識照顧自己，最後要學嘅就係照顧別人。
今日嘅你，係邊一個階段？
Search